അത്‌ലറ്റുകളുടെ സാമ്പത്തിക ഭാവി സുരക്ഷിതമാക്കാന്‍ ജെപി മോര്‍ഗന്‍ ചേസ്; ഡ്വെയ്ന്‍ വേഡും ടോം ബ്രാഡിയും ഒന്നിക്കും

കായിക താരങ്ങളുടെ സാമ്പത്തിക സുരക്ഷിതത്വം ഉറപ്പാക്കുക എന്ന ലക്ഷ്യത്തോടെ ലോകപ്രശസ്ത ധനകാര്യ സ്ഥാപനമായ ജെപി മോര്‍ഗന്‍ ചേസ് പ്രമുഖ കായിക താരങ്ങളുമായി ചേര്‍ന്ന് പുതിയ സംരംഭത്തിന് തുടക്കമിട്ടു. 'ജെപി മോര്‍ഗന്‍ ചേസ് അത്ലറ്റ് കൗണ്‍സില്‍' എന്ന പേരില്‍ രൂപീകരിച്ച ഈ സമിതി, കായിക താരങ്ങള്‍ക്ക് അവരുടെ കരിയറിന്റെ വിവിധ ഘട്ടങ്ങളില്‍ ആവശ്യമായ സാമ്പത്തിക മാര്‍ഗനിര്‍ദേശങ്ങളും വിദ്യാഭ്യാസവും നല്‍കുന്നതിലാണ് ശ്രദ്ധ കേന്ദ്രീകരിക്കുന്നത്.

കായിക ലോകത്ത് കരിയര്‍ ദൈര്‍ഘ്യം വളരെ കുറവാണ് എന്നത് ഒരു യാഥാര്‍ഥ്യമാണ്. എന്‍സിഎഎ കോളജ് അത്ലറ്റുകളില്‍ രണ്ട് ശതമാനത്തില്‍ താഴെ ആളുകള്‍ക്ക് മാത്രമേ പ്രൊഫഷനല്‍ തലത്തിലേക്ക് ഉയരാന്‍ സാധിക്കുന്നുള്ളൂ. പ്രൊഫഷനല്‍ കരിയര്‍ നേടുന്നവരില്‍ ഭൂരിഭാഗം പേരും 35 വയസ്സിനുള്ളില്‍ വിരമിക്കുകയും ചെയ്യുന്നു. എന്നാല്‍ 65 ശതമാനം അത്ലറ്റുകള്‍ക്കും വിദ്യാലയങ്ങളില്‍നിന്ന് സാമ്പത്തിക കാര്യങ്ങളെക്കുറിച്ച് യാതൊരു അറിവും ലഭിക്കുന്നില്ല എന്നത് വലിയൊരു വെല്ലുവിളിയാണ്. ഈ വിടവ് നികത്താനാണ് ജെപി മോര്‍ഗന്‍ ചേസ് ലക്ഷ്യമിടുന്നത്.

ലോകത്തിലെ മികച്ച കായിക താരങ്ങളെ ഉള്‍പ്പെടുത്തിയാണ് കൗണ്‍സില്‍ രൂപീകരിച്ചിരിക്കുന്നത്. ജെപി മോര്‍ഗന്‍ ചേസ് നേതൃത്വവുമായി ഈ താരങ്ങള്‍ പതിവായി കൂടിക്കാഴ്ചകള്‍ നടത്തുകയും അത്ലറ്റുകള്‍ നേരിടുന്ന സാമ്പത്തിക ആവശ്യങ്ങളെക്കുറിച്ച് ചര്‍ച്ച ചെയ്യുകയും ചെയ്യും. മൂന്ന് തവണ എന്‍ബിഎ ചാമ്പ്യനായ ഡ്വെയ്ന്‍ വേഡ് ആണ് കൗണ്‍സിലിന്റെ അധ്യക്ഷന്‍. ടോം ബ്രാഡി, മേഗന്‍ റാപ്പിനോ, അലക്‌സ് മോര്‍ഗന്‍, സ്യൂ ബേര്‍ഡ് തുടങ്ങിയ ഇതിഹാസ താരങ്ങള്‍ സമിതിയില്‍ അംഗങ്ങളാണ്. താരങ്ങളുടെ അനുഭവസമ്പത്ത് ഉപയോഗിച്ച് മറ്റ് അത്ലറ്റുകള്‍ക്ക് അനുയോജ്യമായ സാമ്പത്തിക പദ്ധതികള്‍ തയ്യാറാക്കുക എന്നതാണ് സമിതിയുടെ പ്രധാന ചുമതല.

പ്രധാന ബിസിനസ് നീക്കങ്ങള്‍

• അത്ലറ്റ് സെന്റര്‍ ഓഫ് എക്‌സലന്‍സ്: കായിക താരങ്ങളുടെ സാമ്പത്തിക സാഹചര്യങ്ങളെക്കുറിച്ച് ആഴത്തില്‍ അറിവുള്ള പ്രൊഫഷണലുകളുടെ നേതൃത്വത്തില്‍ പ്രവര്‍ത്തിക്കുന്ന പ്രത്യേക കേന്ദ്രമാണിത്.
• വിദ്യാഭ്യാസ സംരംഭങ്ങള്‍: യൂണിവേഴ്‌സിറ്റികളിലും വലിയ കായിക മാമാങ്കങ്ങളിലും നേരിട്ടെത്തി അത്ലറ്റുകള്‍ക്ക് സാമ്പത്തിക സാക്ഷരത നല്‍കുന്നതിനുള്ള പരിപാടികള്‍ ജെപി മോര്‍ഗന്‍ ആസൂത്രണം ചെയ്യുന്നു.
• ഡിജിറ്റല്‍ ഹബ്ബ്: jpmorgan.com/ace എന്ന വെബ് അഡ്രസ്സില്‍ പ്രത്യേകം സജ്ജീകരിച്ച എജ്യൂക്കേഷണല്‍ പോര്‍ട്ടല്‍ വഴി കരിയറിന്റെ ഓരോ ഘട്ടത്തിലും ആവശ്യമായ സാമ്പത്തിക മാര്‍ഗനിര്‍ദേശങ്ങള്‍ കമ്പനി ലഭ്യമാക്കും.

സമ്പന്നരായ അത്ലറ്റുകളെയും ടീമുകളെയും വെല്‍ത്ത് മാനേജ്മെന്റ് സേവനങ്ങളിലേക്ക് ആകര്‍ഷിക്കുന്നതിനുള്ള നീക്കമാണിത്. വെല്‍ത്ത് മാനേജ്മെന്റ് രംഗത്ത് കൂടുതല്‍ വിപണി വിഹിതം നേടാന്‍ ഇത്തരം സ്‌പെഷ്യലൈസ്ഡ് സേവനങ്ങള്‍ കമ്പനിയെ സഹായിക്കും. ചുരുങ്ങിയ കാലയളവില്‍ ലഭിക്കുന്ന വലിയ വരുമാനം ശരിയായ രീതിയില്‍ നിക്ഷേപിക്കാനും കരിയര്‍ അവസാനിച്ച ശേഷവും സുസ്ഥിരമായ ജീവിതം നയിക്കാനും ഈ പദ്ധതി കായിക താരങ്ങളെ പ്രാപ്തരാക്കും.

Content Highlights: JPMorganChase partners with sports legends to help athletes master their money